WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan den Stadion Antoine Maduro. Riba djabièrnè tabata e ekipo di Sithoc ku a topa ku SUBT. Akinan tabata SUBT ku a logra kue e tres puntonan despues di a derota Sithoc ku skor di 3-0. E golnan di SUBT a keda anotá pa Jimenez de la Crus i Christopher Martha(2x).
Riba djasabra e kampionato a kontinuá ku dos partido. Den e promé partido tabata Scherpenheuvel ku a enfrentá Jong Colombia. Akinan ambos ekipo a bai kas ku un punto despues di a empatá na 0 gol.
Den e di dos partido di djasabra tabata Victory Boys ku a enfrentá e ekipo di Centro Barber. Akinan tabata Victory Boys ku a logra e triunfo derotando Centro Barber ku skor di 3-1. Pa Victory Boys e golnan a keda anotá pa Charginio Bilkerdijk(2x) i un outogol. Miéntras úniko di Barber a keda anotá pa, Jurensley Martina.
E kampionato a kontinuá djadumingu ku un partido entre Centro Dominguito i UNDEBA. Akinan tabata Centro Dominguito ku a logra e tres puntonan derotando UNDEBA ku skor di 1-0/ E úniko gol di Centro Dominguito a keda anotá pa Ashar Bernardus.