CUBA — E selekshon di futbòl di Kòrsou a logra pasa pa e siguiente buèlta di eliminatorio pa Mundial Rusia 2018 despues di a empatá na un gol ku Cuba den Stadion Perdro Marero. Na di sinku minüt di e partido e ekipo cubano a logra habri e markadó. Pero e selekshon di Kòrsou ku a hunga un mihó futbòl den e promé mitar ku e partido di siman pasa na Kòrsou a logra igualá e partido. Tabata Vidarell “Papito” Merencia ku a igualá e partido na di 16 minüt pa e selekshon di Kòrsou.
Na di 44 minüt di e partido Kòrsou a haña un oportunidat pa kue e bentaha ora ku Gino van Kessel ta bai laga e defensa cubano, pero akinan e kiper di Cuba ta frustra e avanse i ta tumba van Kessel algun meter for di e area penal. E kiper cubano a risibí un karchi kòrá pa e hungada aki.
Despues di un retraso di kasi dos ora pa motibu di mal tempu e di dos mitar di e partido a kuminsá. Den e di dos mitar Cuba tabata ataká kontinuamente miéntras ku Kòrsou a bai hunga un wega kompletamente defensivo. Apesar di e atakenan kontinuá di Cuba nan no a logra konvertí esaki na gol i e partido ta finalisá ku e skor ya konosí di 1-1.
Pa Cuba e kaminda pa Mundial Rusia 2018 a yega na su fin. Kòrsou lo hunga e di tres buèlta eliminatorio entre 31 di ougùstùs i 8 di sèptèmber di e aña aki. Ainda no ta konosí ken Kòrsou lo enfrentá den e buèlta aki. Esaki lo bira konosí despues di e sorteo ku FIFA lo tene riba 25 di yüli 2015 na Rusia.
Ainda no ta tur selekshon a kaba di hunga e di dos buèlta di eliminatorio. Di esunnan ku a klasifiká kaba ta: Antigua and Barbuda, Barbados, Belize i Saint Vincent and the Grenadines. Miéntras ku Jamaica i Haiti ta keda añadí na e buèlta.