Kòrsou ta empatá ku Cuba

WILLEMSTAD — Dilanti di un Stadion Ergilio Hato yena ku fanátiko e selekshon di Kòrsou a empatá na sero gol ku Cuba. Esaki tabata e promé partido di dos den e di dos buèlta di e eliminatorio pa mundial Rusia 2018. E partido desisivo di e buèlta aki lo bira djadumingu awor den e di dos partido na Cuba.

Segun Etienne Siliee e selekshon di Kòrsou tin kos di drecha promé ku e partido di djadumingu. E selekshon lokal a mantené poseshon durante henter e partido. Sin embargo e selekshon no a logra konvertí esaki den gol.

Pasenan na algun okashon tabata falta presishon i te na ora ku e presishon tabata tei e reseptor di e pase tabata pèrdè kontrol di e bala. Apesar di esaki e selekshon di Kòrsou a haña algun oportunidat pa anotá pero esaki a keda rechasá pa e kiper Cubano i na otro okashon pa e lata.

Djadumingu 14 di yüni na stadion Pedro Marrero na Cuba lo tin e partido desisivo pa e dos selekshon nan aki. Pa Kòrsou sea e gana na Cuba of logra un empate di mas di sero gol ta sufisiente pa pasa pa siguiente buèlta.