MERKA/WILLEMSTAD — International Baseball Partners a anunsiá e nòmbernan di e kuater ekiponan ku lo forma parti di e Liga di Beisbòl Invernal na Kòrsou. E kuater ekiponan ku lo forma parti di e liga ku ta plania pa kuminsá den òktober próksimo ta: The Curaçao Monarchs, The Willemstad Capitals, The Banda Bou Wild i The Banda Ariba Barracudas.
“Nos ta kere ku e Liga di Beisbòl Invernal di Kòrsou lo bira e prenda nobo den beisbòl profeshonal Karibense tambe nos ke proyektá e kualidatnan úniko di Kòrsou na e komunidat di beisbòl global,” Michael Powers, ‘managing direktor di International Baseball Partners a bisa.
Kada ekipo su nòmber ta kaptura un kualidat úniko asosiá ku e isla di Kòrsou.
Segun Powers, “‘The Monarchs’ ta kaptura e historia kolonial di Kòrsou, miéntras ku ‘The Capitals’ ta anunsiá e asiento di gobièrnu. ‘The Wild’ ta representá e bunitesa di naturalesa ku tin riba e isla i ‘The Barracudas’ ta krea un imágen di e bida bou di e awanan blou di Kòrsou.
E liga ku ta propone pa mira akshon di hungadónan di Liga Grandi, Liga Menor i tambe hungadónan di Kòrsou huntu ku hungadónan profeshonal Hulandes ya ta hañando atenshon den e sírkulonan altu di beisbòl.