ALEMANIA — Hannover 96 a yega na un akuerdo ku Charlison Benschop ku temporada pasa e hunga ku e ekipo di Fortuna Dusseldorf den di dos divishon na Alemania. E kontrakt di Benschop ku Hannover 96 ta kore ta ku 30 di yuni 2018.
Segun Charlison, den Hannover lo e haña e oportunidat pa desaroyá su abilidatnan i tambe pa traha un nòmber den Bundesliga.
Temporada pasa ku Fortuna Dusseldorf e delantero di Kòrsou a hunga den 58 partido i a anotá na 25 okashon.
E direktor deportivo di Hannover 96 Dirk Dufner, ta kere ku den Charlison e ekipo lo siguí fortalesa su liña ofensivo. Mas aleu Dufner a bisa ku, “Charlison a prueba su kualidatnan ku Fortuna Dusseldorf i e ekipo Hannover ta kontentu ku e la skohe nan.”