VERACRUZ — E direktiva di e ekipo di Rojos del Águila de Veracruz a anunsiá ku Sharnol ‘Pachito’ Adriana lo ta e mènedjer interino pa e ekipo. Sharnol lo tin ku trese un kambio den e ekipo di Tripel A ku aktualmente ta den bòm Liga Mehikano di Beisbòl ku un rèkert di 19-29.
“Den kaso ku nos risibí bon resultado ku Sharnol na kabes, lo mi kita e interino for di su título,” e presidente di e ekipo, Jose Antonio Mansur a bisa. Segun e presidente, “Sharnol ta un tipo kapas i ku hopi eksperensia den Liga Mehikano di Beisbòl.”
Pa Sharnol na e momentu nan aki e ta bai pone atenshon na e parti mas fuerte di e ekipo di kual ta velosidat. “Nos tin ku usa nos velosidat, wak e numbernan, nan no ta gaña, nos tin un ekipo rápido anto asina nos ta bai hunga, nos no por warda riba e bataso oportuno ku no ke kai, miéntras nos ta haña batidonan di poder ku por konektá honron, nos lo usa nos mihó arma,” Sharnol a bisa.
Sharnol for di aña pasa tabata coach di bateo ku e ekipo. Pero segun e presidente di e ekipo, e la duna instrukshon kaba pa buska un coach di bateo nobo ya Sharnol por enfoká solamente riba dirigí e ekipo.