MERKA — Despues di un temporada di beisbòl profeshonal na Taiwan, Shairon Martis lo bolbe hunga beisbòl na Merka. Esaki ta e konklushon ku nos por saka despues di a risibí e notanan di e partido entre Somerset Patriot i Bridgeport Bluefish.
Segun e notanan di e ekipo di Somerset Patroits pa e partido di awe 11’or di mainta kontra Bridgeport Bluefish, Shairon Martis lo ta riba montikulo pa Bridgeport Bluefish. Sin embargo, ainda esaki no ta konfirmá pa e ekipo di Bluefish ni e agente di Shairon.
E ekipo di Bridgeport Bluefish ta hunga for di Bridgeport, Conneticut i ta forma parti di e Liberty Division den e Liga di Beisbòl Profeshonal Atlántiko ku ta un Liga Independiente.
Temporada pasa Shairon a picha pa e ekipo di Uni-President7-Eleven Lions na Taiwain. Na Taiwan Shairon a logra un rèkert di 8-7 ku un efektividat di 3.14.