ZEIST — Tin algun kara nobo den e kampamentu di entrenamentu di e selekshon Nashonal di Kòrsou ku ta kuminsá awe. Den e karanan aki tin e kiper estelar di Vitesse, Eloy Room. Segun informashonnan, Room a tuma e desishon definitivo pa forma parti di e selekshon di Kòrsou.
Tambe Patrick Kluivert a invitá na e kampamentu di entrenamentu e medio kampista di Sparta Jeremy de Nooijer. de Nooijer ta yu di èks-futbolista profeshonal Dennis de Nooijyer. Segun Jeremy di 23 aña di edat, su mama tin sanger Antiano p’esei e por hunga pa Kòrsou. “Mi mama ta mitar Antiano i mitar Etiopiano”, e medio kampista di Sparta a bisa.
E selekshon di Kòrsou lo hiba un kampamentu di entrenamentu di tres dia na Hulanda. E kampamentu aki ta kulminá djárason ku e partido di fogeo kontra Sürnam den e stadion di Almere City.
Den un nota ménos positivo, e selekshon di Kòrsou lo no por konta ku Charlton Vicento den e kampamentu aki. Vicento a leshoná den fin di siman tras di lomba. E gravedat di e leshon no ta konosí ainda, pero si e ekipo a anunsiá ku Charlton lo no hunga otro siman pa e ekipo. Tabata Charlton Vicento ku den e partido kontra Montserrat a drenta na di 82 minüt i despues empatá e partido na di 87 minüt, hinkando Kòrsou den e siguiente buèlta di eliminatorio pa Mundial 2018.