WILLEMSTAD — E klínika di NEC ku tabata plania pa dia 14 di mei a keda kambia pa awe djárason 13 di mei.
Den kuadro di bishitá di NEC Voetbal Club, ku a kaba di promové pa e promé divishon aya na Hulanda, nan a ofresé pa tene un klínika pa nos entrenadó nan i miembronan di staf médiko di nos ekiponan lokal durante nan estadia aki na Kòrsou.
E klínika lo tin dos workshop separá ku ta tuma lugá dia 13 di Mei 2015 di 18.30pm pa 21.30pm.
E workshop nan aki lo tuma lugá na FFK Trainings Centrum i na FFK Fitness Centrum na Brievengat.
E promé workshop lo analisá e konsepto teóriko di desaroyo di kiper i lo ta na enkargo di sr. Wilfred Brookhuis i despues lo sigui un seshon di práktika ku nos kipernan lokal huntu ku e kiper di NEC sr. Jorritsma Smeets. Miéntras e di dos workshop lo kubri e inovashon riba kuido médiko di un tim di futbòl na enkargo di e staf médiko di NEC.
E workshop destiná pa kipernan lo tuma lugá den sala reunion di FFK i despues riba tereno, miéntras ku e workshop pa e staf médiko ta den e Fitness Center di FFK.
Tene kuenta ku tur dos presentashon ta tuma lugá na e mesun oranan ariba menshoná.
E invitashon ta pa prinsipalmente tur nos kipernan for di hubenil te ku senior i tambe nos entrenadó nan i staf médiko di futbòl lokal.
Por inskribí na ofisina FFK via di numbernan di telefòn 736-5040 òf 7365042 i por puntra pa yùfrou Nadine Carolina.