WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan na Stadion Antoine Maduro (SUBT). Riba djasabra tabata e ekipo di Centro Barber ku a enfrentá UNDEBA. Akinan tabata Centro Barber ku a logra bai ku e viktoria derotando UNDEBA ku skor di 3-1. Pa Barber e golnan a keda anotá pa Jurensley Martina (2x) i Kenneth Kunst. Miéntras ku e úniko di UNDEBA a keda anotá pa Jimbertson Vapor.
Den e di dos partido di djasabra tabata e ekipo di Centro Dominguito ku a enfrentá Jong Holland. Akinan tabata Centro Dominguito ku a sali di e porta grandi derotando Jong Holland ku skor di 1-0. Pa Dominguito e gol a keda anotá pa Norvaniel Naar.
Djadumingu tambe tabata tin dos partido. Den e promé partido Hubentut Fortuna ku a enfrentá SUBT. Akinan tabata SUBT ku a bai ku e tres puntonan despues di a derota Hubentut Fortuna 1-0. Pa SUBT e gol a keda anotá pa Kacir Jimenez.
Den e di dos partido di djadumingu Sithoc a topa ku e ekipo di Victory Boys. Akinan tabata Sithoc ku ta logra nan promé tres puntonan den Liga MCB derotando Victory Boys ku skor di 3-1. Pa Sithoc e golnan a keda anotá pa Jason Inecia i Raylison Amerikaan miéntras ku Cedricson Antonio ta hinka un outogol. Pa Victory Boys e úniko gol a keda anotá pa medio di un pinalti kobra pa Raylison Lindo.
Liga MCB ta kontinuá awe nochi ku e partido entre Jong Colombia i Scherpenheuvel na Stadion Antoine Maduro (SUBT).