WILLEMSTAD — Liga Lito, patrosiná pa MCB, ta e liga di futbòl pa nos muchanan di U-6 ku U-8 (edat bou di 6 i 8 aña) ku kada dos siman riba djadumingu di mainta pa mèrdia, ta ehersé nan deporte preferí na tereno di FFK.
Despues ku aña pasa, 14 di dezèmber 2014 a klousura Liga Lito pa e aña ei, kaminda nos muchanan, coachnan, mayornan i un gran públiko a gosa un bòl, den presensia di Lito, ku tambe a asistí na klousura di su liga, MCB i FFK kier a anunsiá e apertura di Liga Lito 2015.
Esaki ta tuma lugá djadumingu aki, 26 di aprel 10or di mainta na tereno di FFK.
FFK kier a yama danki na tur e timnan ku a partisipá na Liga Lito, e coachnan, mayornan, prensa, rèfrinan, komishon Lito, nos spònser MCB, Lito i tur ku a duna un aporte na un eksitoso liga Lito di aña pasa i ta spera tur hende ku e mesun entusiasmo pa nos por tin un Liga Lito 2015 eksitoso e aña aki tambe.
Un yamada ta bai na hinter e pueblo di Kòrsou i spesialmente e fanátikonan di futbòl pa asistí na e liga dediká nos chikitin nan. Bin presensia e weganan aki ku ta kompletamente grátis i disfrutá di e partidonan aki ku hinter bo famia.