BAHAMAS — CONCACAF a anunsiá ayera ku tres persona a keda skohe pa su Salon di Fama komo muestra di honor pa nan kontribushon na futbòl. E tres persona nan ku a keda selekshoná ta Andres Constansia di Kòrsou, Rafael Callejas di Honduras i Aaron Padilla di Meksiko.
Segun presidente di CONCACAF, Jeffrey Webb; “Salon di Fama ta e manera apropiá pa honra personanan prominente manera Andres Constansia, Rafael Callejas i Aaron Padilla, ku kada un a hasi un impakto den historia di e deporte i e konfederashon.”
Huntu ku presidente di FIFA Joseph Blatter, presidente Webb a otorga un plakat na e honorarionan. Ku e adishon di señornan Constansia, Callejas i Padilla e Salon di Fama di CONCACAF tin 36 miembro. Di e 36 meimronan aki awor Korsou tin dos miembro den Salon di Fama di CONCACAF, esta sr. Andres Constansia i sr. Mordy Maduro (dfm).
Sr. Andres Avelino Constansia a nase na Kòrsou dia 10 di novèmber 1936 i a traha na fabor di futbòl pa mas di 50 aña. E la kuminsá komo hungadó di Jong Colombia, pa despues sirbi komo coach i dirigente pa e ekipo. Bou di su supervishon Jong Colombia a logra numeroso título di Kòrsou i di Antias. Tambe Sr. Constansia a sirbi komo presidente di Curaçaose Voetbal Bond (CVB) i tambe Nederlands Antilliaanse Voetbal Unie (NAVU). Tambe Sr. Constansia tabata miembro di direktiva di Caribbean Football Union i tambe miembro di e Komishon Finansiero di FIFA.