Centro Dominguito, Jong Colombia, Jong Holland i Victory Boys ku tres punto den Liga MCB

WILLEMSTAD — E kampionato di futbòl promé divishon Liga MCB a kontinuá den wikènt tras di lomba ku partidonan na Stadion Antoine Maduro i na Stadion Ergilio Hato. Riba djabièrnè tabata e ekipo di UNDEBA ku a enfrentá Victory Boys den Stadion Antione Maduro. Tabata Victory Boys ku a logra bai ku e viktoria derotando UNDEBA ku skor di 3-1. Pa Victory Boys e golnan a keda anotá pa Randel Winklaar, Jhudamier Marchena i Norman Hoyer. E úniko gol di UNDEBA a keda anotá pa Ruensley Leuteria.

Riba djasabra tabata tin dos partido den Stadion Ergilio Hato. Den e promé partido tabata Jong Holland ku a derota SUBT ku skor di 2-1. Pa Jong Holland tabata Nathan Marina i Jerachmeel Cleofa ku a anotá. Miéntras ku pa SUBT tabata Harold Vargas.

Den e di dos partido di djasabra tabata e ekipo di Jong Colombia ku a enfrentá Sithoc. Akinan tabata Jong Colombia ku a sali di e porta grandi derotando Sithoc ku skor di 2-1. Pa Jong Colombia e golnan a keda anotá pa Frenly Servania i Munier Asiedu. E úniko gol di Sithoc a keda anotá pa Jason Inecia.

Riba djadumingu tabata Hubentut Fortuna ku a enfrentá Scherpenheuvel den e promé partido. Akinan ambos e ekipo a logra bai kas ku un punto despues di un empate na un gol. Pa Hubentut Fortuna e gol a keda anotá pa Luis Miranda miéntras ku pa Scherpenheuvel e gol a keda anotá pa Naigel Valorian.

Den e ultimo partido di wikènt e ekipo di Centro Barber a topa ku Centro Dominguito. Akinan tabata Centro Dominguito ku a sali viktorioso ku skor di 3-1 riba Barber. E golnan di Dominguito a keda anotá pa Ashar Bernardus, Luidjino Hoyer i Shaquelle Clements. E gold i Barber a keda anotá pa Christopher Isenia.

Tabla di posishon despues di kuater siman:

Ekipo H G E P GF GK GD Pt.
C. Dominguito 4 4 0 0 8 3 5 12
Jong Holland 4 2 2 0 4 2 2 8
Victory Boys 4 2 1 1 8 3 5 7
Scherpenheuvel 4 1 3 0 6 5 1 6
Jong Colombia 4 2 0 2 4 9 -5 6
CSD Barber 4 1 1 2 12 7 5 4
Subt 4 1 1 2 8 5 3 4
Undeba 4 1 1 2 6 6 0 4
Hub. Fortuna 4 1 1 2 4 4 0 4
FC Sithoc 4 0 0 4 2 18 -16 0