MERKA — Den ultimo simannan mi a tuma nota kon ku gran emoshon i orguyo Federashon Futbòl Kòrsou a bin ta propagá e partidonan eliminatorio pa Mundial 2018 komo oportunidatnan pa krea un nashon. Mi no tin niun opheshon pa ku esaki i ta duna FFK rason di usa momentunan asina aki pa purba krea un nashon den union i ala bes alsa nos nivel di patriotismo. Pero ora bo tuma nota di sierto kosnan ku sierto miembronan di e Federashon aki ta hasi, bo ta puntra bo mes ku ta di bèrdat FFK ke purba krea un nashon of esaki ta simplemente un kapa pa haña akohida bou di suidadanonan.
Djabièrnè ultimo promé ku e partido di Kòrsou kontra Montserrat mi a subi internet pa mi por skucha e partido na un di e emisoranan lokal. Grandi tabata mi sorpresa ora ku mi a tende ku e emisora ku mi tabata sintonisando, kual ta Radio Hoyer lo no pasa e partido mas apesar di a propagá esaki durante dianan.
Aun mas asombrá mi a keda ora ku mi a risibí informashon riba e motibu dikon Radio Hoyer lo no transmití mas. Mi a komprendé ku Radio Hoyer no a transmití mas pa motibu ku na momentu ku nan a yega Stadion Ergilio Hato nan a haña un otro emisora den nan hòki di transmishon. Awor bo por bisa dikon Radio Hoyer no a bai den un otro hòki i transmití for di un otro hòki? Esei tabata sugerensia di FFK tambe, pero e problema tabata ku segun ma komprendé e kabel di antena di Radio Hoyer ta pasa solamente den e hòki spesífiko aki i esaki tin años ta pasa ei den i tabata imposibel pa den e ora nan promé ku e partido instalá den un otro hòki transmishon. Kòrda bon ku Radio Hoyer no ta e siman aki ni siman pasa nan a kuminsá transmití futbòl. E emisora aki tin historia amplio den transmishon di futbòl tantu lokal komo internashonal.
Ami personalmente komo miembro di e Asosiashon Internashonal di Prensa Deportivo (AIPS) ta haña e kos aki insolito i un falta di rèspèt pa prensa en general. Ta internashonalmente konosí ku den bòksnan di prensa di ekiponan deportivo tin sierto reglanan ku ta goberná e lugá di trabou. Un di esakinan ta ku tin sierto herarkia den e asignashon di asiento i hòkinan di transmishon pa prensa. Si FFK of su miembronan no konosé esaki mi ta invitanan pa kompañá mi den un evento deportivo internashonal di moda ku nan por mira kon ta trata ku prensa deportivo.
Si FFK lo kier a kambia e emisora di su hòki kustumbrá lo tabata bon i korekto pa notifiká esaki adelantá di moda ku e emisora por hasi e kambionan nesesario adelantá. Deporte Awe ta mustra su solidaridat na e koleganan di prensa deportivo di Radio Hoyer i ta rechasá kategorikamente e manera di opera i trata prensa ku FFK a tuma. Awe ta Radio Hoyer mañan nan ta hasi meskos ku Deporte Awe i/of otro media di komunikashon.
E siguiente partido grandi di e selekshon di Kòrsou lo ta yüni próksimo, pues FFK tin tempu sufisiente pa evaluá nan manera kon ta trata prensa en general. Kòrda ku e kreashon di un nashon ta kuminsá serka kada un di nos promé. Si nos mes sea konsiente of inkonsiente ta trese konflikto i divishon bou di nos mes, hamas i nunka nos lo no por ta un nashon uní.