WILLEMSTAD — Ayera den oranan di anochi e hungadónan di Oropa ku ta forma parti di e selekshon di Kòrsou a yega Kòrsou. Preparashonnan ta kuminsá awe pa e partido bálido pa klasifikashon pa Mundial Rusia 2018 di djabièrnè próksimo kontra Montserrat den Stadion Ergilio Hato. Apesar di a keda anunsiá den e selekshon definitivo pa e partido aki, e avion for di Hulanda a aterisa na Kòrsou ku un hungadó ménos.
Guyon Fernandez di NAC Breda a kanselá na ultimo ora. E number 9 di NAC a opta pa keda Hulanda huntu ku su ekipo pa kaba di rekuperá di algun leshon. Segun Fernandez, ainda e ta sinti molester di su man ku e la fraktura luna pasa. Tambe e delantero ta bisa ku resientemente e la haña un sla na su rudia.
Apesar di esaki Guyon tin plania di uni ku e selekshon den e siguiente buèlta kontra Cuba si e selekshon Nashonal gana di Montserrat.
Banda di Guyon, e selekshon di Kòrsou tin Germaine ‘Kemy’ Agustien ku tambe ta leshoná. Segun un fuente no ofisial, te ainda Agustien no ta plania pa hunga den e partido kontra Montserrat djabièrnè awor. Pa loke ta trata e otro partidonan ainda no tin desishon riba disponibilidat di e medio-kampista di Brighton & Hove Albion FC.