Bonevacia, Bacuna, Hooi i Room a kanselá partisipashon ku e selekshon Blou-Hel

WILLEMSTAD — Despues ku djamars ultimo a keda anunsiá ku Roly Bonevacia di Wellington Phoenix lo no hunga na final di e luna aki pa Kòrsou den e partido kontra Montserrat, tin tres otro hungadó ku segun informashonnan tambe a kanselá na partisipashon. Elson Hooi di Viborg FC a bisa ku e no por ta presente den e partido kontra Montserrat. Sin embargo, Hooi no ta deskartá e posibilidat di hunga kontra Cuba den kaso ku e selekshon di Kòrsou gana di Montserrat. Pa Hooi ta difísil pa e bandoná e ekipo di Viborg FC na e momentunan aki.

Leandro Bacuna di Aston Villa ku tambe tabata indesiso a tuma un desishon i bisa ku e lo no forma parti di e selekshon blou ku hel. Meskos ta konta pa e kiper di Vitesse Eloy Room, ku no ke sera e porta pa su partisipashon ku e selekshon Hulandes.

Di e hungadónan di afó te ainda e selekshon di Kòrsou por konta ku entre otro Guyon Fernandez i Felitciano Zschusschen di NAC Breda. E ekipo di NAC Breda ya a deklará e dos hungadónan aki liber pa hunga pa e selekshon di Kòrsou.

Den e próksimo dianan e selekshon definitivo lo mester keda konfirmá pa Federashon Futbòl Kòrsou ku ta spera e hungadónan di afó pa dia 23 di mart próksimo. Sin embargo, tin informashonnan ku tin un grupo di Whatsapp krea bou di algun di e hungadonan internashonal ku ta hiba e nòmber di: “potensial internashonalnan di Kòrsou”. Den e grupo aki tin entre otro, Vurnon Anita, Charlison Benschop, Cuco Martina, Darryl Lachman i Eloy Room ku miéntras tantu a kanselá su partisipashon.

E promé wega di e selekshon Blou-Hel ta tuma lugá djabièrnè 27 di mart den stadion Ergilio Hato pa 8’or di anochi. E di dos partido lo tuma lugá djamars 31 di mart na Montserrat.