WILLEMSTAD — Di 27 febrüari te ku 15 di mart 2015 a tuma lugá e kampionato di U-17 di CONCACAF na Honduras pa saka e kuater paisnan di e zona di Nort, Sentro Amérika i Karibe ku ta bai representá CONCACAF na e kampionato Mundial U-17 na Chile aña aki.
Den e kampionato aki e kampion di e region a resultá Mexico siguí pa Honduras, despues Estados Unidos i di kuater Costa Rica.
Pa e enkuentronan aki, CONCACAF a skohe pa forma parti di su grupo di estudio tékniko un representante di kada region di CONCACAF. Komo miembro di e grupo CONCACAF tabata rekerí un tékniko eksperensiá komo eksperto pa por hasi análisis di wega profundo i pa trese rekomendashonnan tékniko pa mehorá e nivel di futbòl den e region di CONCACAF.
Den e grupo di estudio tékniko tabata tin un representante Merka (Los Angeles), un di Mexico, dos di Honduras, dos di e Union Sentro Amerikano di Futbòl, dos di e Union di Futbòl Karibense, un di Jamaica i un di Kòrsou. E miembro di Kòrsou ku a keda selekshoná tabata sr. Etienne Siliee.
Tur e miembronan di e grupo tin tras di nan CV, un of dos Mundial komo hungadó mundialista of komo entrenador mundialista. Sr. Etienne Siliee den e kaso aki komo un máksimo instruktor di CONCACAF, a ser invitá pa forma parti di e grupo aki komo eksperto den e zona di CONCACAF pa bini ku rekomendashonnan pa ser inkluí den programa tékniko pa mehorá i engradesé futbòl den e region.