WILLEMSTAD — Minister Palm riba invitashon di e organisashon di beisbol Baltimore Orioles, djamars 17 di mart 2015, a bishitá e fasilidat di spring training di e ekipo pa e wega entre Orioles i Twins. Durante e enkuentro aki, Minister Palm a hiba kòmbersashon ku e gerente general di Baltimore Orioles, Sr. Dan Duquette, Sr. Fred Ferreira (Executive Director of International Recruiting) i Sr. Joel Bradley (International Scout), kendenan a konfirmá e interes di e organisashon di Orioles pa establesé nan ekipo di verano na Kòrsou, pa por desaroyá nan talentonan hoben di e region ku ta keda firmá.
E interes aki ta den kuadro di e proyekto di e grupo IBP (International Baseball Partners). E direktor di IBP, Sr. Michael Powers, resientemente a bishitá Kòrsou i a presentá e konsepto na Minister Palm.
E intenshon ta pa den e promé fase di e proyekto, ofresé fasilidatnan pa 4 ekipo por praktika i realisá enkuentronan. Kada ekipo lo mester di 2 vèlt standard i 1 vèlt di infield. Ademas mester di fasilidat di alohamentu i “weight training” pa tantu e hungador- i coachnan. Kada ekipo ta konsistí di 80 hungador. Esaki ta nifiká ku pa e promé fase di e proyekto, Kòrsou lo ta pa 320 hungador profeshonal. E posibilidat ta hopi grandi ku unabes e 4 ekiponan establesé na Kòrsou e sobrá 26 ekiponan di Major League Baseball tambe lo sigui. Esaki lo subi e sifra na 2,400 hungador profeshonal di baseball na Kòrsou.
Esaki sigur lo tin su impakto ekonómiko, konsiderando e kantidat di divisas ku e sektor aki lo generá, e rekonosimentu di nòmber di Kòrsou ku lo yuda nos turismo, i e kantidat di kupo di trabou ku esaki lo nifiká pa nos hendenan lokal, tantu den e area di mantenshon di e vèltnan, umpire, scorer, komo den e parti di alohamentu, kushina, limpiesa, seguridat i mas.
Minister Palm a palabrá ku lo enbolbí Cinex (Curaçao Investment and Export Promotion agency) i Ministerio di Desaroyo Ekonómiko pa duna asistensia na IBP pa finalisá e plannan. Algun aspekto importante pa kual IBP mester di ayudo di Gobièrnu ta entre otro e terenonan (8 hèktar pa kada ekipo), pèrmit di estadia pa e hungador- i coachnan, eksonerashon di impuesto riba material i demas kondishonnan di impuesto, pa menshona algun. IBP i Minister Palm a ekspresá e deseo mutuo pa firma un MoU (Memorandum of Understanding) DENTRO DI 1 LUNA pa por yega na e plannnan konkreto pa realisá e proyekto aki.
IBP ta den deliberashon ku Major League Baseball i úniko aspekto ku falta awor ta aprobashon final di parti di MLB pa asina Kòrsou por krea su sektor ekonómiko nobo: BEISBOL.