WELLINGTON — Roly Bonevacia di Wellington Phoenix lo no hunga na final di e luna aki pa Kòrsou den e partido eliminatorio pa mundial Rusia 2018, segun reportero di 3News Zelandia Nobo. E mediokampista tabata un di e 30nan ku a keda selekshona den e selekshon tentativo di Kòrsou. Roly lo tabata tin ku pèrdè dos partido di su ekipo Wellington Phoenix ku ta en búskeda di un título den nan liga i a base di esaki a opta pa keda ku su ekipo.
Banda di Bonevacia ainda tin Leandro Bacuna i Eloy Room ku no ta sigur di nan partisipashon ku e selekshon di Kòrsou. Bacuna ainda ta pensando riba su partisipashon i a bisa ku lo e tuma un desishon ora ta mas serka di e fecha. Mientras ku e kiper di Vitesse, Eloy Room ta kana ku e speransa di hunga ku e selekshon Ulandes ainda i ta evaluando kiko ta e mihó desishon.
Federashon Futbòl Kòrsou ta spera ku e hungadónan di afó ta yega Kòrsou pa kuminsá entrená 23 di mart próksimo. Lo no dura masha mas ku mas hungadó lo tuma un desishon i e selekshon definitivo bira konosí.