WILLEMSTAD — Preparashonnan ta den full swing pa e kompromiso di Kòrsou kontra Monserat di djabièrnè 27 di mart próksimo. Miéntras ku Patrick Kluivert i e tim tékniko di Federashon di Futbòl Kòrsou ta konfirmando e hungadónan pa kompletá nos selekshon, karchinan pa e partido ta na benta pa asina pueblo por sostené nos ekipo nashonal di futbòl den nos promé kompromiso rumbo pa mundial na Rusia na 2018. Komo un pueblo, un ekipo nos mester bai pa un meta, esta un viktoria. Naturalmente e 11 hòmbernan riba tereno defendiendo nos kolonan nashonal lo no por hasi e trabou sin e sosten di e di 12 hungadó, kende ta e públiko. P’e motibu aki FFK ta invitá un i tur, fanátiko di futbòl, deportista i pueblo en general pa ban sostené nos selekshon nashonal dor di yena Stadion Ergilio Hato. P’asina huntu, nos vense Monserat.
E plantel nashonal na e momentu aki ta hañando forma i pronto lo por anunsiá e nòmber definitivo di esnan selektá pa hunga pa nos selekshon nashonal. Kòrsou manera tur otro pais lo hasi uso di e espasio den e kalènder di FIFA pa disponé di e hungadónan pa nan ta na Kòrsou pa prepará. Komo ku ta trata di hungadónan ku nivel altu di konosementu di e wega i téknika nan lo akoplá. E hungadónan di afó ta yega Kòrsou pa entrante 23 di mart i uni ku esnan di Kòrsou pa entrená desde 23 di Mart.
Segun presidente di FFK, Jean Francisca:
“Sosten di pueblo i asistensia masal di públiko ta hopi importante pa nos logra gana e partido aki. Kada un partido ta unu i nos mester gana pa sigui den e kontienda. Nos ta konvensí ku nos lo gana di Monserat pero sin e sosten en grande di nos públiko esaki no ta posibel. Laga nos komo un pueblo uní sostené nos ekipo di 11 hungadó riba tereno pa nos por logra viktoria. Un di e promé kos ku kada un di nos mester hasi ta kumpra bo karchi pa bo por tei komo e di 12 hungadó den tribuna pa animá nos muchanan”
Karchi pa tribuna bou di dak ta kosta Nafl. 50,-, karchi pa tribuna ku dak ku ta benta pa Festival Center ta kosta Nafl. 35,- i karchi pa tribuna no kubri ta kosta Nafl. 25,-. Karchinan pa sekshon VIP ta kosta Nafl. 250,-. Karchinan ta na benta na ofisina di FFK djis patras di Sentro Deportivo Kòrsou. Pronto lo anunsiá e otro puntonan di benta. Boso asistensia pa ta e di diesdos hungadó ta hopi esensial.