BREDA — Siman pasa Federashon Futbòl Kòrsou a presentá e selekshon tentativo di 30 hungadó ku lo representá Kòrsou den e eliminatorio pa Kopa Mundial Rusia 2018. Ainda no a keda divulgá pa FFK ken ta e 23 hungadónan ku lo ta den e selekshon definitivo, pero tur kos ta parse ku Guyon Fernandez i Felitciano Zschusschen di NAC Breda lo ta den. A lo ménos esei ta loke por konkluí for di un komunikado ku e ekipo di NAC a saka.
Segun e ekipo di NAC Breda, “tantu Guyon Fernandez komo Felitciano Zschusschen ta liber pa partisipá ku e selekshon di Kòrsou na final di mart próksimo.” Mas aleu e ekipo ta bisa ku mes ora despues di e di dos partido kontra Montserrat ambos hungadó lo biaha pa Hulanda bek pa prepará huntu ku NAC pa e enkuentro di 4 di aprel kontra Heerenveen.”
Di parti di e ekipo esaki ta zona basta konvensiente ku su dos hungadónan lo ta huntu ku e selekshon di Kòrsou pa e partidonan kontra Montserrat. Sin embargo, FFK tin te 24 ora promé ku e partido di 27 di mart pa entrega e selekshon definitivo.
Un di tres hungadó, Roly Bonevacia di Wellington Phoenix te ku algun dia pasa a bisa ku e no a disidí ainda si e lo hunga ku e selekshon di Kòrsou den e eliminatorionan pa Kopa Mundial Rusia 2018
Kòrsou su promé kompromiso ta kontra di Montserrat dia 27 di mart próksimo den stadion Ergilio Hato na Kòrsou miéntras ku dia 31 di mart e selekshon blou ku hel lo enfrentá Montserrat na Montserrat.