WILLEMSTAD — Kòrsou ta subi e via rumbo pa kampionato mundial 2018 na Rusia. Un meta ku nos selekshon nashonal ta soña pe i determiná pa logra. Kòrsou su promé kompromiso ta kontra di Montserrat dia 27 di mart próksimo den stadion Ergilio Hato na Kòrsou miéntras di 31 di mart nos lo enfrentá Montserrat na Montserrat.
Federashon di Futbòl di Kòrsou ku plaser ta anunsiá ku nos a logra firma Patrick Kluivert komo konsehero ku tin supervishon i guia di nos selekshon nashonal di futbòl. E preselekshon di Kòrsou, ta konta ku algun di nos mihó yunan di tera ku ta hunga afó i na kas.
Ekipá ku e mihónan riba tereno e úniko ku falta ta sosten masal di públiko pa apoyá nos selekshon i sigurá un triunfo riba Montserrat. Pa e motibu aki FFK ke invitá henter pueblo pa ban yena Stadion Ergilio Hato i sostené nos selekshon i biba momentunan emoshonante rumbo pa Rusia.
Meskos ku ekiponan di tur otro nashon nos selekshon lo entrená huntu na vispera di e enkuentro kontra di Montserrat ora ku e kalènder di FIFA ta permití. E hungadónan ku ta bini di afó ta yega Kòrsou dia 23 di mart i aki lo uni nan mes ku esnan selekshoná lokal pa prepará pa e kompromiso kontra di Montserrat.
“Nos ta kontentu di por konta ku nos streanan ku lo sali en buska di viktoria pa Kòrsou. Nan meresé nos tur su sosten komo e di 12 hungadó. Ganando na kas nos ta kue bentaha riba nos kontrinkantenan. E úniko manera pa nos hasi esaki ta ku apoyo masal di nos pueblo. FFK i su partnernan ta hasiendo lo máksimo pa e tantu e enkuentro kontra di Montserrat i esun kontra di Cuba bira un eksperensia úniko pa kada un hende ku bin stadion i sostené nos selekshon. E reto no ta fásil pero ku fe determinashon i sosten di nos tur nos lo logra avansá i krea momentunan di orguyo pa nos hóben nashon’’ Jean Fransisca, presidente di FFK a bisa.
Karchinan pronto lo ta optenibel na rason di ANG 50,- pa bou di dak i ANG 25,- pa otro partinan no kubri di stadion. Karchinan VIP ya ta na benta na ofisina di FFK na rason di ANG 250,- florin. Kada un di nos, kumprando un karchi pa e próksimo wega kontra Montserrat ta yuda patrosiná nos orguyonan nashonal, pasombra e gastunan ta haltu i ala bes lo duna sosten moral den stadion na nos selekshon.
FFK ta kontentu tambe, ku banda di por konta ku sosten di pueblo den e esfuerso grandi aki, ta bai firma kartanan di intenshon ku nos spònsernan mayó. E intenshon ta pa traha i formalisá esakinan den patrosinio di nos selekshon nashonal di futbòl riba kaminda pa Rusia 2018.
Pues nos tur tin un kompromiso ku nos selekshon nashonal, djabièrnè 27 di mart pa 8or di anochi den Stadion Ergilio Hato.