WILLEMSTAD — Awe Federashon Futbòl Kòrsou lo tin un rueda di prensa kaminda lo duna informashon riba e weganan eliminatorio mundial Rusia 2018. Segun FFK, durante e rueda di prensa aki Patrick Kluivert i e ‘branding partners’ di e federashon lo tei pa duna splikashon riba nan kontribushon pa ku weganan eliminatorio Rusia 2018.
Ya pa algun dia tin informashonnan ta sirkulá ku Partick Kluivert lo ta e direktor tékniko di e selekshon di Kòrsou. Sin embargo, FFK ni tampoko e èks-delantero di entre otro Ajax, AC Milan i FC Barcelona no a konfirmá esaki. Tin detayenan nobo ku ta bisa ku Kluivert lo no ta e direktor tékniko pa e selekshon di Kòrsou sino un supervisor pa e federashon di futbòl lokal. Awe tardi durante e rueda di prensa federashon lo tin ku duna mas informashon riba esaki i konfirmá kiko e ròl eksakto di Kluivert lo bai ta.
Adishonal tin informashonnan ta bisa ku Kluivert a tuma un kontrakt di algun luna ku e federashon lokal di futbòl. Den su ròl di supervisor lo keda na Kluivert si e ta sinta riba banki ku e selekshon durante di e partidonan eliminatorio.
E selekshon di Kòrsou lo hunga den promé buèlta kontra Montserrat. E promé wega kontra Montserrat ta tuma lugá djabièrnè 27 di mart den stadion Ergilio Hato pa 8’or di anochi. E di dos partido lo tuma lugá djamars 31 di mart na Montserrat. Ganando di Montserrat, Kòrsou tin di hunga kontra Cuba na luna di yüni próksimo.