MERKA — Andruw Jones a anunsiá ku e lo no partisipá mas ku e selekshon di Tur-Strea oropeo ku ta programa pa hunga dos partido di ekshibishon kontra e selekshon di Hapon dia 10 i 11 di mart próksimo. E selekshon di Oropa a sali ayera pa Tokio kaminda nan lo hunga nan dos partidonan den Tokyo Dome.
Den un komunikado Andruw a bisa lo siguiente: “Ku hopi pena mi ta anunsiá e desishon difísil ku mi no por representá e ekipo di Oropa den su debut históriko kontra e selekshon Nashonal di Hapon dilanti di e fanátikonan apashoná i familiar di Hapon. Miéntras ku inisialmente mi a plania pa ta parti di e roster di Oropa, kompromisonan nobo por rekerí ku mi ta for di kas pa e próksimo lunanan, pa e motibu aki mi a hasi mi prioridat number unu pa pasa mas tantu tempu posibel na kas ku mi famia i yunan ku ta bayendo skol. Ta keda un gran honor pa a keda selekshoná dor di koach Janssen pa bisti e kamiseta di Oropa i mi ta deseá e ekipo di Oropa i e evento di ‘Samurai Japan Global Baseball’ tur klase di éksito. Lo mi sigui e weganan i spera ku e gran inisiativa aki lo kontribuí na globalisashon di e deporte.”
Den ultimo lunanan Andruw a ekspresá su deseo pa regresá Liga Grandi. E pelotero a hiba kòmbersashon ku diferente ekipo di Liga Grandi i ultimo aki, e ekipo di Leones de Yucatan na Mehiko tambe a pidi permit pa negosiá ku e pelotero. E komunikado di Andruw ta pinta den e direkshon ku e pelotero tin of ta bai yega na un akuerdo pronto. Den Liga Grandi, Andruw tabata tin kòmbersashon ku entre otro Houston Astros, Baltimore Orioles, Cleveland Indians, Atlanta Braves i Miami Marlins.