WILLEMSTAD — Futbòl promé divishon Liga MCB a ranka sali ayera ku e promé partido di temporada den Stadion Antoine Maduro (SUBT). Den e promé partido aki tabata e ekipo di Centro Barber e ekipo kampion di Liga MCB Promé Divishon 2014 ku a enfrentá Scherpenheuvel e ekipo kampion di Liga MCB Segundo Divishon.
E ekipo di Scherpenheuvel ta bin dos biaha di atras pa zona un kampanaso i derota e ekipo kampion di di Liga MCB Promé Divishon 2014 ku skor di 3-2. Pa Barber e golnan a keda anotá na di 3 minüt pa Deannejive Willems i na di 25 minüt pa Jurensley Martina. Mientras ku pa Scherpenheuvel, Bryan Roosje ta empata na di 18 minüt, Naigel Valorian ta bolbe empatá e partido na di 30 minüt i Dichairo Bernabela ta anotá e gol di viktoria na di 77 minüt.
Liga MCB Promé Divishon 2015 ta wòrdu dediká na Romualdo ‘Shon Ma’ Gomez, Ronald ‘Pong’ Martel, Alouisio ‘Jopi’ Rojer, Engelbrecht Schotborgh i Ronaldo Da Sousa. Otro siman e kampionato ta kontinuá ku e otro ekiponan mirando akshon.