LOS ANGELES — E ekipo di Los Angeles Dodgers a anunsia ku Kenley Jansen lo perde e komienso di temporada regular pa motibu di un operashon ku a keda hasi na pia robes di e pelotero pa kita un kresementu di un wesu. E ekipo ta kere ku Kenley lo perde entre 8 pa 12 siman.
Tabata siman pasa ku Kenley a sinti inkomodidat ora e tabata kore. Mes ora e ekipo a laga saka potret di e pia di e picher ku a mustra un kresementu di un wesu den su pia. Bou di direkshon di e dokter di ekipo Kenley a keda opera ayera na hospital Cedars-Sinai na Los Angeles.
Dodgers a bisa ku Kenley lo tin ku hasi uso di kruk pa kana durante e siguiente 10 dianan aproksimadamente i despues lo tin su pia den un buts speshal pa 3-4 siman. E ekipo a duna di konoso ku e regreso di Kenley ta depende di kon lihe e rekupera di e operashon pero ta estima ku lo tuma entre 8 pa 12 siman. Na 12 siman for di awe ta nifika ku Kenley lo ta bek ku e ekipo banda di 13 di mei proksimo.
Den 2014 Kenley a salba 44 partido pa Dodgers ku un efektividat di 2.76 den 68 partido.