- Segun informashonnan, e ekipo di New York Yankees tin pensa di retirá e number di uniform 46. Esaki komo rekonosementu di e èks-picher Andy Pettitte ku atrabes di su karera a logra bira e picher ku mas partido gana den post-temporada. E ekipo tin pensa di hasi esaki dia 23 di ougùstùs próksimo promé ku e partido di New York Yankees kontra Cleveland Indians. Pettitte tabata tin un karera di 18 temporada den Liga Grandi kaminda e la logra un rèkert di 256-153 ku un efektividat di 3.85. Adishonal e picher a logra 19 viktoria adishonal durante post-temporada.
- Derek Jeter lo no tei pa e tira e promé bala seremonial durante e promé partido di temporada di New York Yankees dia 6 di aprel próksimo. Segun e pelotero, e lo no tei na Merka mes. “Lo mi ta for di e pais,” Jeter a bisa. Segun Jeter e la praktiká e deporte profeshonalmente durante 23 temporada i awor a yega tempu pa mi distansia mi mes for di dje.
- Segun informashonnan, e ekipo di New York Yankees a ofresé Yankee Stadium komo un lugá tentativo pa Alex Rodriguez diskulpa su mes pa uso di supstansia prohibí. Durante e reunion ku Yankees tabata tin ku A-Rod siman pasa, nan a bisa ku nan ke pa e pelotero dirigí su mes na prensa promé ku djabièrnè aki. No tabata tin masha informashon a sali despues di e reunion ku Yankees i Rodriguez tabata tin siman pasa. Pero awor ta sali na kla ku e ekipo a bisa A-Rod bon kla ku nan ta keda ku e idea pa keda sin pag’e e bononan di honron konektá. Ainda no tin fecha un fecha pone pa Rodriguez dirigí su mes na prensa i diskulpa.
- Victor Sanchez, un di e picher prospektonan top di e ekipo di Seattle Mariners mester a keda hospitalisá na Venezuela djabièrnè ultimo. Esaki despues ku e pelotero tabata landando na un laman na Venezuela i a keda alkansá pa un boto. E pelotero a risibí un fraktura na su kabes i mester a keda opera. Segun dokternan, Sanchez ta luchando pa su bida. Sanchez tabata konsiderá un di e mihó picher prospektonan for di Venezuela na 2011 ora ku Mariners a firme na edat di 16 aña ku un bono di 2,5 mion dòler.