- E ekipo di Atlanta Braves a anunsiá ku picher Shae Simmons a hasi operashon di Tommy John ayera i lo pèrdè kompletu e temporada 2015. E relevista di 24 aña a subi den mei di aña pasa ku e ekipo i a picha den 26 partido ku un efektividat di 2.91. Shae mester a pèrdè e ultimo dos lunanan di temporada pa motibu di leshon na skouder. Segun informashonnan, for di siman pasa e pelotero a kuminsá keha di dolo den su kokoti. Esaki ta splika tambe dikon den e ultimo siman e ekipo di Atlanta a firma veteranonan Jose Veras, Todd Coffey i Matt Capps na kontrakt di Liga Menor ku invitashon pa Spring Training.
- San Francisco Giants a yega na un akuerdo ku tersera base Casey McGehee i asina evitá e proseso di arbitrahe salarial. E dos partidonan a bai di akuerdo pa un suma di 4,8 mion dòler pa e temporada 2015. Giants a risibí McGehee den un kambio ku Miami Marlins. Temporada pasa ku Marlins e pelotero a tabata tin un promedio di .287 ku 4 honron i 76 kareda empuha.
- Kansas City Royals a yega na un akuerdo di dos aña ku picher/relevista Kelvin Herrera. E akuerdo ta pa 4,15 mion dòler for di kua Herrea ta haña 1,6 mion den 2015 i 2,55 mion dòler den 2016. Temporada pasa e ‘setup-man’ di Royals a parese den 70 partido i tabata tin un efektividat di 1.41.
- Major League Baseball huntu ku Miami Marlins a programa un konferensia di prensa awe tardi na stadion di Miami Marlins. E komunikado no ta bisa spesífikamente kiko ta e motibu di e konferensia, pero ta papia di un anunsio importante. Sin embargo, tin spekulashonnan ku Major league Baseball ofisialmente lo bai anunsiá ku e All-Star Game di aña 2017 lo keda hunga na Miami.