Breve Deporte Awe #1-018

  • Den Little League, e organisashon di Little League International a kita e título for di e ekipo di Chicago ku a gana e ‘U.S. Championship’ durante di e Little League World Series aña pasa. Segun Little League International e ekipo di Jackie Robinson West a hasi uso di peloteronan ku ta biba pafó di e area geográfiko ku e ekipo ta representá. E koachnan di e ekipo tambe a risibí un suspenshon. Segun informashonnan, e organisashon di Jackie Robinson West a presentá mapa ku fronteranan falsifiká i a reuní ku distritonan di Little League den e area pa traha un super-ekipo. Ku esaki e título ta pasa pa e ekipo di Mountain Ridge Little League di Las Vegas.
  • E ekipo di Seattle Mariners a anunsiá ku nan a firma e segunda base Rickie Weeks pa un aña na 2 mion dòler. Temporada pasa ku e ekipo di Milwaukee Brewers e pelotero tabata tin un promedio di .274 ku 8 honron i 29 kareda empuha. E ekipo di Mariners tin pensa di laga e pelotero hunga segunda base ora nan duna Robinson Cano liber i tambe lag’e hunga outfield.
  • Oakland Athletics a yega na un akuerdo ku picher Tyler Clippard evitando asina aki e proseso di arbitrahe salarial. Ainda no ta konosí e montante ku e dos bandanan a bai di akuerdo ku ne, pero ta pensa ku lo ta entre 7,775 mion dòler i 8,85 mion dòler. Oakland a risibí Clippard na yanüari ultimo den un kambio ku Washington Nationals pa Yunel Escobar. Temporada pasa Clippard tabata tin un efektividat di 2.18 den 75 partido komo relevista.
  • Den e dianan próksimo ta toka turno pa e ekiponan di Arizona Diamondbacks i Chicago Cubs pa tira un bista riba e prospekto kubano Yoan Moncada. Den e próksimo dos simannan e pelotero lo tuma oferta di ekiponan interesá ku ta interesa. Segun e agente di e pelotero, no muchu despues di e dos simannan aki e ta spera ku e pelotero lo tuma un desishon. Los Angeles Dodgers, New York Yankees, Boston Red Sox i San Diego Padres tur ta ekiponan ku ta tras di e pelotero aktualmente.