WILLEMSTAD – Despues ku Kòrsou a klasifiká pa partisipá pa e último buèlta pa klasifikashon pa Gold Cup otro aña yüli 2015 na Merka i a pèrdè tur su 3 weganan Kòrsou a regresá kas.
Kòrsou a gana den e promé dos buèlta nan tantu na Puerto Rico komo Guadeloupe, den e dos parti di e aña aki, pa por a partisipá den e último buèlta e siman ku a pasa ei na Montego Bay, Jamaica.
Pa por a klasifiká Kòrsou mester a sali por lo ménos na di dos lugá den tres partido ku ela hunga ku 3 pais, esta Trinidad & Tobago, Cuba i Guyana Franses.
E partido kontra Trinidad i Tobago Korsou a pèrdè 3-2, kontra Cuba tambe 3-2 i kontra Guyana Franses Kòrsou a pèrdè sorpresivamente 4-1 djasabra último.
E promé partido kontra Trinidad aunke ku Kòrsou tabatin mihó parti di e partido, sigur den di 2 mitar, nos a kai vensí 3-2. E motibu prinsipal tabata e defisiensia grandi di koordinashon den nos defensa i nos portero. E di dos partido tambe nos a pèrdè pa e mes motibu ku skor di 3-2 kontra Cuba. Den e wega ku nos a pèrdè kontra Cuba ala bes a bini aserka ku e gol di Cuba a kai na 95 minüt di e partido, despues di e ora reglamentario via un kòrner ku ta kai den área chikí i un hungadó suplente di Cuba ta skor. Mesora despues e rèfri ta terminá e partido, pues un gol di viktoria pa Cuba despues ku e tempu reglamentario a pasa pero ku e rèfri no a konsiderá komo konsekuensia ku Kòrsou a pèrdè e partido. Esaki tabatin konsekuensia pa rèfri tambe pa su partisipashon pa restu di e weganan di Caribbean Cup.
E último partido kontra Guyana Franses Kòrsou a pèrdè 4-1 pa e mes un motibu di falta di koordinashon entre defensa i portero. Ya na komienso di e partido Kòrsou a hañá dos gol franko pero no a kaba e trabou. Despues pa mal entendimentu entre defensa i portero Guyana ta hinka 3 gol den e promé mitar di e partido. Den e di 2 mitar Guyana ta hasi e wega 4-0 atrobe pa motibu di fayo entre nos defensa i portero. Den di dos mitar via un bon kombinashon Kòrsou ta hasi e wega 4-1 i e ta terminá komo tal. Nos tin di bisa ku e mesun Guyana aki Kòrsou a empatá na algun luna pasa den e promé buèlta di e torneo aki na Puerto Rico.
Lokual tabata remarkabel den e torneo aki ku tur pais a reforsá ku nan mihó hungadónan ku ta hunga den eksterior hasta tabatin diferente pais ku tur e hungadónan ku a partisipá a bini for di eksterior manera entre otro Haiti i Guyana Franses. Esaki a alsa nivel di e torneo enormemente kompará ku den pasado, reklamo general si tabata ku tin di hunga tantu wega asina den un siman. Mínimo 3 wega.
Otro aña eliminatorio pa mundial FIFA 2018 na Rusia ta kuminsá i Kòrsou mester partisipá. Ku e eksperensia ku nos a haña den e klasifikashon aki pa Gold Cup, amigu i enemigu na Jamaica a trese bon kla dilanti ku Kòrsou tin e material nesesario pa yega masha leu mes den e eliminatorio aki i ku mester tene debidamente kuenta ku Kòrsou. Kòrsou aunke ku nos a pèrdè, sin tabatin nodi, tin tur chèns den e weganan pa klasifikatorio pa mundial. Trabou tin i un kos ta sigur Kòrsou por i nos no tin mester di tin miedu mas di ningun kontrinkante den region.
FFK kier gradisí un i tur ku a kontribuí pa e logronan di Kòrsou den eliminatorio di Caribbean Cup aki, prinsipalmente nos spònsernan, nos hungadónan, sr. Makaya di TeleCuracao ku a bai riba nan mes gastu, prensa kompletu i henter pueblo di Kòrsou pa nan sosten. Kòrsou no a gana pero Kòrsou a laga mundu hinter mira ku nan tin di tene kuenta debidamente ku nos i ta bon di tende ku nan mes ta atmití esei. Esaki, danki na nos aktuashon den e torneo aki. Un biaha mas masha masha danki pa e sosten i nos ta sigui konta ku boso!