JAMAICA – E selekshon di Kòrsou ku ta partisipando na e Kopa Karibe a sufri su di dos derota. E biaha aki tabata e ekipo di Cuba ku a gana di Kòrsou ku skor di 3-2. Cuba ta habri e markadó na di 15 minüt di e partido. Na di 45 minüt Kòrsou ta empatá e partido ku gol di Prince Rajcomar.
Cuba ta bai ariba 2-1 na di 51 minüt di e di dos mitar. Un biaha mas Kòrsou ta bin bek i empatá riba un tiru liber di Gevaro Nepomuceno. E partido ta keda 2-2 te den e di sinku minüt di tempu adishonal. Akinan Cuba ta bai ariba 3-2 riba un kòrner net promé ku e pitaso final.
Ku esaki Kòrsou ta sufri su di dos derota di e torneo i ta pèrdè e pase outomátiko pa CONCACAF Gold Cup na 2015. Ainda Kòrsou tin un chèns pa yega CONCACAF Gold Cup pero esaki ta nifiká ku Kòrsou mester sali e mihó number tres den e Kopa Karibe i konsekuentemente mester gana e próksimo partido pa mantené e speransa.
E di tres mihó selekshon di Kopa Karibe lo enfrentá Honduras den un partido di play-off, ku e ganadó avansando pa CONCACAF Gold Cup 2015. Den e ultimo partido riba djasabra 15 di novèmber e selekshon di Kòrsou ta enfrentá French Guiana.
Tabla di posishon despues di dos partido:
| Ekipo | WH | G | E | P | GF | GK | GD | Pt |
| Trinidad & Tobago | 2 | 2 | 0 | 0 | 7 | 4 | 3 | 6 |
| Cuba | 2 | 1 | 1 | 0 | 4 | 3 | 1 | 4 |
| French Guiana | 2 | 0 | 1 | 1 | 3 | 5 | -2 | 1 |
| Korsou | 2 | 0 | 0 | 2 | 4 | 6 | -2 | 0 |