WILLEMSTAD – Futbòl Liga MCB su buèlta di 6 a kontinuá ku partidonan riba djabièrnè i djadumingu ultimo. Riba djabièrnè tabata tin e partido entre UNDEBA i Victory Boys. Akinan tabata UNDEBA ku a bai ku e viktoria i retrasá un posibel pase di Victory Boys pa Kaya 4. Ku e derota di 4-1, Victory Boys tin ku sinta warda i wak kiko ta bai pasa awe nochi den e partido di Jong Holland kontra SUBT.
Victory Boys tabata tin e bentaha di 1-0 den e partido aki te den di 76 minüt, akinan UNDEBA a empatá e enkuentro i despues añadí tres gol mas pa gana 4-1. Pa UNDEBA e golnan a keda anotá pa; Christopher Lopez, Norvianle Naar, Jimbertson Vapor i Edison Welvaart. Miéntras ku pa Vylison Lake. Victory Boys lo ta den Kaya 4 ku tur resultado ménos un viktoria di Jong Holland awe nochi.
Riba djadumingu tabata tin e partido entre e dos Centronan. Akinan tabata Centro Dominguito ku a derota Centro Barber ku skor di 2-0. Pa Centro Dominguito e viktoria ta garantisá ku e ekipo ta klasifiká na e promé puesto pa Kaya 4. Ambos gol di Dominguito a keda anotá pa Ashar Bernardus.
Awe nochi tin e ultimo partido di e Buèlta di 6 ora ku Jong Holland enfrentá SUBT. SUBT ya no tin niun chèns mas pa drenta e buèlta di 4, miéntras ku pa Jong Holland un viktoria awe nochi lo hinka nan den Kaya 4 i saka Victory Boys afó.
Tabla di posishon:
| Ekipo | PH | G | E | P | GF | GK | GD | Pt |
| Centro Dominguito | 5 | 4 | 1 | 0 | 10 | 2 | 8 | 13 |
| UNDEBA | 5 | 3 | 1 | 1 | 7 | 2 | 5 | 10 |
| Centro Barber | 5 | 2 | 1 | 2 | 8 | 8 | 0 | 7 |
| Victory Boys | 5 | 1 | 2 | 2 | 9 | 13 | -4 | 5 |
| Jong Holland | 4 | 0 | 3 | 1 | 5 | 7 | -2 | 3 |
| SUBT | 4 | 0 | 0 | 4 | 2 | 9 | -7 | 0 |