Resultadonan di Beisbòl Liga Grandi di ayera:
Seri Mundial
- San Francisco Giants a pèrdè di Kansas City Royals ku skor di 10-0
Kansas City a habri e markadó den di dos entrada ora ku nan a anotá 7 kareda riba 8 hit. Banda di esaki Kansas a risibí yudansa di nan picher habridó Yordano Ventura ku a picha 7 entrada kompletu sin permití kareda riba solamente 3 hit. Ku e viktoria aki Kansas ta forsa un di shete partido den e Seri Mundial. Esaki ta bira e di 37 biaha ku un seri miho-di-7 den Seri Mundial ta bai e distansia kompletu.
Kansas City Royals ta bai purba di bira e di 20 ekipo ku ta bin bek bin gana Seri Mundial despues di tabata atras 3-2. E ultimo ekipo ku a hasi esaki tabata St. Louis Cardinals ku a gana di Texas Rangers despues di tabata atras 3-2 na aña 2011.
Pa Kansas esaki lo bira e di dos okashon ku nan ta hunga den e di shete partido den Seri Mundial. Nan ultimo biaha tabata na 1985 ora ku den e di shete partido Kansas a derota St. Louis Cardinals ku skor di 11-0. E aña aki Kansas tabata atras 3-1 den e seri.
Di otro banda, San Francisco su prestashon den e di shete partido di Seri Mundial no ta masha alentador. Giants lo partisipá na nan di sinku partido number shete di Seri Mundial. Na tur e kuater okashonnan previo e ekipo di San Francisco a pèrdè e ultimo partido.
Pa loke ta trata ekipo di kas of bishitante esaki no ta hasi un diferensia estadistikamente. Di e previo 36 okashonnan ku Seri Mundial a bai shete partido e ekipo di kas a gana 18 (50,0%) i e ekipo bishitante tambe a logra gana 18 (50,0%). Awe nochi lo bin un kambio den esaki, sea e ekipo di kas of e bishitante lo bai un wega ariba.
Partidónan di Liga Grandi pa awe:
Seri Mundial
- San Francisco Giants kontra Kansas City Royals (Di 7 partido di e seri, ku e seri empatá na 3-3)