Resultadonan di Beisbòl Liga Grandi di ayera:
Seri Mundial
- San Francisco Giants a pèrdè di Kansas City Royals ku skor di 7-2
Un biaha mas San Francisco Giants a bai ariba for di den promé entrada riba un honron solitario di Gregor Blanco. Kontrali na e promé partido, Kansas City Royals a respondé mes ora i empatá e partido den bòm di promé. Kansas a bai ariba 2-1 den bòm di dos entrada. San Francisco a bin bek i empatá e partido den di kuater entrada. E partido a keda empatá na 2 kareda te den bòm di seis entrada. Akinan Kansas a habri e partido anotando 5 kareda riba un doblete empuhador di dos di Salvador Perez i un honron di dos kareda konektá pa Omar Infante. Ku e viktoria aki e seri ta empatá awor na unu, ku e próksimo partido na San Francisco dia 24 di òktober.
Pa San Francisco Giants esaki ta e di 10 okashon ku nan ta involukrá den un empate di 1-1 den Seri Mundial. Den e nuebe biaha nan previo, San Francisco a bai na gana e seri solamente na un okashon (1905). E empate di 1-1 den un seri mihó-di-shete ta algu nobo pa Kansas, nunka nan no a eksperensia esaki.
Segun estadistika, di e previo 56 biahanan ku un seri di Seri Mundial tabata empatá na 1-1, e ekipo ku gana partido number 2 a sigui i titulá kampion na 29 okashon (51.8%). Sin embargo, e ultimo aki tabata e kaso den solamente dos di e ultimo nuebe okashonnan for di aña 1993.
Estadistikamente e di tres partido ta importantisimo. E ekipo ku gana e di tres partido ora e seri ta empatá na 1-1 a logra sali Kampion Mundial na 37 okashon (66.1%). Esaki tabata e kaso den kuater di e ultimo sinku okashonnan. Mas aleu, esaki tabata e kaso den e ultimo 11 di 13 okashonnan. E dos eksepshonnan tabata St. Louis Cardinals na 2013 i New York Yankees na 2003.
Partidónan di Liga Grandi pa awe:
Seri Mundial
- Awe no tin partido den Liga Grandi. E siguiente partido ta 24 di òktober próksimo ora ku Kansas City Royals topa San Francisco Giants den e di tres partido di Seri Mundial ku e seri empatá na 1-1
Breve:
- Informashonnan ku ta sirkulando ta bisa, ku Roger Bernadina ta den kòmbersashon ku e ekipo di Tiburones de La Guaira den beisbòl invernal na Venezuela. Den kaso ku Roger djòin e ekipo e ta uni su mes ku Juan Carlos Sulbaran ku ya ta formando parti di e staf di picheo di Tiburones. Aktualmente e ekipo di Tiburones de La Guaira tin un rèkert di 4-7
- Kenley Jansen a keda premia komo finalista pa relevista di aña den Liga Nashonal pa Major League Baseball. Craig Kimbrel di Atlanta Braves a bai ku e premio di mihó relevista den Liga Nashonal. Den Liga Merikano e premio a bai pa e picher di Kansas City Royals, Greg Holland