WILLEMSTAD – Futbòl Liga MCB su buèlta di 6 a kontinuá ku tres partido den wikènt tras di lomba na Stadion Ergilio Hato. Riba djabièrnè tabata e ekipo di Victory Boys ku a enfrentá SUBT. Akinan tabata Victory Boys ku a logra duna SUBT nan di tres derota konsekutivo den e buèlta di 6 i gana ku skor di 2-1. Pa Victory Boys e golnan a keda anotá pa; Charginio Bilkerdijk i Vylison Lake. Miéntras ku e úniko di SUBT a keda anotá pa Geryon Alberto.
Riba djasabra tabata tin e di dos partido ora ku Centro Barber a topa ku UNDEBA. Akinan tabata UNDEBA ku a logra nan promé viktoria den e buèlta di 6 ora ku nan a derota Barber ku skor di 2-0. Ku e derotá aki, Centro Barber ta haña nan promé wega pèrdí den e buèlta di 6. Ambos gol di UNDEBA a keda anotá pa Edgard Casssiani.
Riba djadumingu tabata Centro Dominguito i Jong Holland ku a mira akshon. Tabata Centro Dominguito ku a habri a markadó pa medio di un gol di Luidjino Hojer. Pero Jong Holland a sa di bin bek i empatá e partido na 1 ku gol di Jerome Jemeison. E partido ta terminá den un empate na 1 gol i ambos ekipo ta bai kas ku 1 punto.
Tabla di posishon despues di 3 partidó den buèlta di 6:
| Ekipo | PH | G | E | P | GF | GK | GD | Pt |
| Centro Dominguito | 3 | 2 | 1 | 0 | 6 | 2 | 4 | 7 |
| Victory Boys | 3 | 1 | 2 | 0 | 8 | 7 | 1 | 5 |
| UNDEBA | 3 | 1 | 1 | 1 | 2 | 1 | 1 | 4 |
| Centro Barber | 3 | 1 | 1 | 1 | 5 | 5 | 0 | 4 |
| Jong Holland | 3 | 0 | 3 | 0 | 4 | 4 | 0 | 3 |
| SUBT | 3 | 0 | 0 | 3 | 2 | 8 | -6 | 0 |
Ainda e ekiponan den buèlta di 6 tin dos partido mas pa bai. Manera kos ta awor aki nada no ta definí ainda.