Roger Bernadina, Jair Jurrjens i Andruw Jones riba merkado

WILLEMSTAD – Roger Bernadina ta bai en búskeda di un ekipo nobo, despues di a opta pa bira agente liber. Roger a finalisá temporada 2014 ku e ekipo di Los Angeles Dodgers despues di a kuminsá temporada ku Cincinnati Reds.

Pa Roger esaki ta bira e dos aña konsekutivo ku e ta drenta e merkado di agente liber. Na komienso di e aña aki tambe Roger tabata agente liber promé ku e la keda kontratá pa e ekipo di Cincinnati Reds. Na yüni e ekipo di Reds a laga Roger den libertat i akinan e pelotero a keda kontratá pa Los Angeles Dodgers.

Ku Dodgers e pelotero a pasa mayoria di su tempu den tripel A, ku e ekipo di Albuquerque Isotopes. Akinan Roger a logra un promedio di .246 den 23 partido. Na sèptèmber ora e ekiponan di Liga Grandi a ekspandé nan roster, Roger a subi ku e ekipo di grandi di Los Angeles. Ku Dodgers, Roger a logra un promedio di .286 den 9 partido.

Di e manera aki, Roger ta uni su mes ku Jair Jurrjens i tambe Andruw Jones ku tambe lo ta en búskeda di un ekipo pa próksimo temporada. Jair for di komienso di luna meskos ku Roger a opta pa bira agente liber.

Jair a habri temporada ku e ekipo di Louisville Bats den tripel A. Akinan Jair a logra un rèkert di 2-3 ku un efektividat di 4.46. Den luna di yüli Jair a keda kambia pa e ekipo di Colorado Springs Sky Sox. Akinan e picher a logra un rèkert di 0-5 ku un efektividat di 4.60. Na dos okashon Jair a haña e oportunidat pa picha ku Colorado Rockies den Liga Grandi. Akinan den dos salida Jurrjens a logra un rèkert di 0-1 ku un efektividat di 10.61.

Ku final di e temporada di beisbòl Hapones, Andruw Jones tambe a yega na final di su kontrakt di un aña ku Rakuten Golden Eagles. Den un deklarashon Andruw a bisa, “ku e no sa ainda unda lo e hunga beisbòl otro aña. Sin embargo, Andruw a bisa ku e ta deseá di yega su di 500 honron akumulá den Liga Grandi i den beisbòl profeshonal Hapones na Hapon.”

Aktualmente Andruw tin 484 honron, 434 den Liga Grandi i 50 na Hapon. E ekipo di Rakuten Golden Eagles no a disidí ainda si nan ta bai kontratá e servisionan di Andruw pa e siguiente temporada.

E ekipo di Rakuten tin un manager nobo den persona di Hiromoto Okubo. Segun Hiromoto, su trabou ta pa krea un ekipo ganadó i e lo hasi tur kos posibel pa logra esaki. Ta tempu lo dikta, si Andruw Jones lo ta parti di e plannan di Hiromoto I e ekipo di Rakuten Golden Eagles.