WILLEMSTAD – E promé partidonan di futbòl Liga MBB Kaya 6 a kuminsá den wikènt tras di lomba na Stadion Ergilio Hato. E promé partido tabata djabièrnè anochi ora ku Centro Barber a topa ku Victory Boys. Akinan ambos ekipo a bai kas ku un punto despues di a empatá na tres gol pa banda. E golnan di Barber a keda anotá pa; Jurensley Martina i Kenneth Kunst(2x). Pa Victory Boys golnan a keda anotá pa un outo gol di Barber i tambe golnan di Gerien Silva i Raylison Lindo.
Djasabra tabata tin e di dos partido ku a bai entre Centro Dominguito i SUBT. Akinan tabata Centro Dominguito ku a bai ku e viktoria, goliando SUBT ku skor di 4-1. Pa Dominguito e golnan a keda anotá pa; Micro Colina JR, Steward Sambo, Shairon Bernardus i Gedeon Poppen. E úniko gol di SUBT a keda anotá pa Alexander Klooster.
Riba djadumingu tabata e ekipo di UNDEBA ku a enfrentá Jong Holland. Akinan ambos ekipo a kompartí punto despues di a empatá na sero gol.
Puntuashon despues di e promé partidonan di Kaya 6:
Centro Dominguito – 3 punto
Centro Barber – 1 punto
Victory Boys – 1 punto
UNDEBA – 1 punto
Jong Holland – 1 punto
SUBT – 0 punto