WILLEMSTAD – Dia 17 di sèptèmber último e organisashon Sport Unie Brion-Trappers, SUBT, a kumpli 89 aña di eksistensia. Pa selebrá e echo aki i huntu ku e klasifikashon di e ekipo barika hel den kaya 6, e ekipo barika hel a pone 3 diferente modèl di flanèl i tambe algun pen na benta.
E idea ta pa tur fanátiko di e ekipo barika hel por tin e flanèl original di nan ekipo stimá i/òf nan pen i bin apoyá nan ekipo durante di kaya 6 ku ta start dia 27 di sèptèmber próksimo kontra di e ekipo Centro Dominguito i durante otro kompromisonan di SUBT.
E flanènan original di e marka Klupp ta optenibel tur dia na vèlt di SUBT despues di 5’or di atardi. Pa komplasé ku e fanátikonan di mas chikí te esnan di mas peso, e ekipo barika hel a sòru pa tin práktikamente tur tamaño disponibel. E flanènan su tamaño ta kuminsá for di 2XS, XS, S, M, L, XL, 2XL te ku 3XL, tur à Nafl. 50,-.
Pa esnan ku ta gusta kolekshoná nan pen, nos tin pen tambe na balor di Nafl. 25,-. Na kompra di e flanè i/òf pen bo ta forma parti di e selebrashon, apoyá bo ekipo stimá i yuda kontribuí ku fondo pa e organisashon Sport Unie Brion-Trappers por sigui realisá mas proyekto pa futuro.