MIAMI – Ministerio Publiko na Miami a tuma e desishon pa no kontinuá den persiguíshon di Wladimir ‘Coco’ Balentien den kaso di violensia doméstiko kontra su kasa, Karla Balentien. Manera ta konosí, Wladimir a keda arestá riba 12 di yanüari 2014 despues di un insidente ku a tuma lugá riba e mesun fecha ey na kas di su kasa. Segun alegashonnan, riba e dia e kuestion e pelotero a drenta kas di Karla Balentien dor di un bentana. Una bes paden, Wladimir a gara su kasa di seis aña na su brasa na momentu ku e kier a kore subi trapi.
Pa e echonan menshoná Wladimir e keda presentá ku dos kargo den su kontra. E promé tabata un kargo di agreshon i otro tabata un kargo di entrada sin permit di un bibienda. Sin embargo, despues di un evaluashon, tabata tin diferente faktor ku a hiba Ministerio Publiko na e desishon pa no kontinuá ku e kaso.
E motibu prinsipal ku Ministerio Públiko a usa den e tomo di desishon aki, ta paso e víktima esta Karla Balentien no ta deseá na kooperá mas den e kaso. Na dos okashon den ultimo lunanan, Karla Balentien a bisa Ministerio Públiko ku e no ta deseá di kooperá mas ku e kaso. Tambe Karla a bisa ku e no tin miedu di Wladimir i ku e ta komprendé ku si e no kooperá mas, e kaso lo keda sera i ku e órden pa Wladimir keda sin aserka tambe ta kanselá.
Banda di esaki, Ministerio Públiko ta di opinion ku e evidensianan den e kaso no ta sufisiente pa kontinuá ku e kaso. Tabata tin dos persona ku e testiguá algun parti di e insidente riba 12 di yanüari 2014. Un di e testigunan ta bida na New York i e otro ta biba na Venezuela, niun di dos testigu no tabata kier a regresá Miami pa presentá den korte durante tratamentu di e kaso.
Mas aleu, niun di dos testigu no a mira e insidente sosodé den su totalidat. Pa e motibu aki nan no por testiguá ku den e kaso aki, Wladimir tabata e agresor prinsipal. Tampoko e testigunan no por testiguá ku Wladimir a keda prohibí pa drenta e kas of ku e kas tabata den poseshon legal di Karla Balentien. Konsekuentemente, Ministerio Públiko no por prueba niun di e dos kargonan den kontra di Wladimir i a disidí pa laga e kaso kai.