WILLEMSTAD – Ku un empate na 0 gol kontra Guyana Franses e selekshon di Kòrsou ta klasifiká pa e di dos buèlta di e CFU Men’s Caribbean Cup Tournament. E selekshon Kurasoleño ku a biaha siman pasa pa Puerto Rico a logra nan klasifikashon ku 1 viktoria i dos empate.
Riba e promé fecha Kòrsou a empatá ku Puerto Rico na dos gol. Despues den e di dos partido e selekshon di Kòrsou a logra un viktoria di 2-1 kontra Grenada. Esaki a pone ku e selekshon tabata tin mester di solamente un empate den su ultimo partido pa avansá pa a siguiente buèlta. Esaki a keda logra tambe, ora Kòrsou a empatá ku Guyana Franses na 0 gol.
Ku e pase pa e siguiente buèlta, e selekshon di Kòrsou lo tin su siguiente kompromisonan entre 6 pa 13 di òktober próksimo na Guadeloupe. Akinan Kòrsou lo ta den Grupo 9 huntu ku e selekshon di kas Guadeloupe tambe Martinique i Saint Vincent.
E selekshon di Kòrsou ku a biaha pa Puerto Rico tabata konsistí di un grupo di 20 hungadó ku ta wòrdu dirigí pa Sr. Ingemar Pieternella ku tabata e direktor tékniko di e selekshon i Sr. Jozef Nivillac ku tabata e asistente di e direktor tékniko.
E 20 hungadonan ku a forma parti di e selekshon tabata:
- Ashar Bernardus
- Shannon Carmelia
- Mirco Colina Jr.
- Mickey Fecunda
- Luidjino Hoyer
- Lendell Johannes
- Rugenio Josephia
- Gillian Justiana
- Kenneth Kunst
- Ruensley Leuteria
- Shelton Martes
- Jurensley Martina
- Rhuently Martina
- Prince Mathilda
- Rihairo Meulens
- Gevaro Nepomuceno
- Jarzinho Pieters
- Frenly Sirvania
- Soranly Thomsjansen
- Merencia Vidarrel
Tambe a biaha huntu ku e selekshon Sr. Etiënne Siliee ku tabata e konsehero tékniko, Sr. Sherwin Martina ku tabata enkargá ku e materialnan di e selekshon, un masahista kual tabata Sr. Clinton Leocadia i e hefe di delegashon Sr. Remfis Donker, miembro di direktiva di FFK.