WILLEMSTAD – Resientemente, komo parti di e programa edukativo di FFK, a tuma lugá un kurso pa bira entrenadó di dama ouspisiá pa FIFA. Sra. Andrea Rodebaugh, instruktor di FIFA tabata esun enkargá pa duna e kurso aki ku a konta ku un total di 30 partisipante. E kurso a kuminsá djamars 26 di ougùstùs i a terminá djabièrnè 29 di ougùstùs. Djasabra último na e inisio di e proyekto di FIFA Live Your Goals, e kursistanan aki ta tin e oportunidat di por a pone tur loke nan a haña durante e dianan di kurso den práktika.
Den e promé parti di e kurso e kursistanan a haña e parti teorétiko ku diferente informashon i material di FIFA ku tabata destiná pa e kurso aki. Den e di dos parti, esun práktiko e kursistanan mester a apliká loke nan haña den e parti teorétiko di e kurso aki huntu ku un grupo di hobensitanan futbolista ku a bin pa yuda durante e práktikanan di e kurso. Despues di 4 dia di kurso intensivo tur e kursistanan aki a kaba e kurso ku éksito a risibí nan sertifikado komo entrenadó di dama.
Awó nos por bisa ku e famia di futbòl pa dama ta konta ku 30 entrenadó di dama mas.
FFK ta hasi un apelashon na e personanan aki ku no ta pertenesé na un klup ainda, pa djòin un klup di FFK pa yuda desaroyá i engrandese e deporte di futbòl pa dama!
FFK ta deseá tur e kursistanan aki éksito i pabien ku nan logro!