Victory Boys ku un pia den Kaya 6 miéntras ku Jong Colombia eliminá

WILLEMSTAD – Futbòl Liga MCB a kontinuá den wikènt tras di lomba na Stadion Ergilio Hato. Den e promé partido djabièrnè anochi e ekipo di SUBT a enfrentá Centro Dominguito. Akinan tabata SUBT ku a duna Centro Dominguito su di dos derota di temporada. Centro Domiguito a pèrdè ambos partido despues di e reseso ku Liga MCB a tuma den luna di yüli. Ku gol di Stallone Isenia SUBT a derota Centro Dominguito ku skor mínimo di 1-0.

Den promé partido di djasabra e ekipo di Jong Colombia a enfrentá Victory Boys. Ku kuater gol den e di dos mitar di e partido Victory Boys a garantisá nan tres punto i gana Jong Colombia ku skor di 4-0. Ku e resultado aki Victory Boys a kaba ku tur speransa di Jong Colombia pa drenta Kaya 6. Victory Boys tin 19 punto faltando dos partido miéntras ku Jong Colombia tin 12 punto. Ku por lo mínimo un empate den un di su próksimo dos partidonan Victory Boys ta garantisá su pase den Kaya 6.

Den e di dos partido di djasabra Hubentud Fortuna a topa ku Sithoc. Akinan e ekiponan a hasi bon ku otro i a empatá na 0 gol. Ku esaki ambos ekipo tin 13 punto. Ainda Sithoc i Hubentud Fortuna no ta kompletamente eliminá pero e dos ekiponan aki su situashon ta krítiko. Ambos ekipo mester gana nan dos ultimo partidonan anotando un andanada di gol i spera ku Victory Boys ta pèrdè su dos ultimo partidonan.

Djadumingu tabata tin un partido so, ora ku UNDEBA a topa ku Jong Holland. Ambos di e ekiponan aki tin nan lugá di Kaya 6 sigurá. Apesar di esaki Jong Holland a gana UNDEBA ku skor di 3-1.

Awe kampionato Liga MCB ta kontinuá ku e partido entre VESTA i Centro Barber.

Tabla di posishon Liga MCB