Sharnol ‘Pachito’ Adriana ta retirá for di beisbòl komo pelotero

VERACRUZ – Despues di 23 temporada beisbòl profeshonal, Sharnol ‘Pachito’ Adriana a anunsiá su retiro  for di beisbòl komo pelotero aktivo. Sharnol a habri e aktual temporada ku e ekipo di Rojos del Águila de Veracruz den Tripel A di e Liga Mehikano di Beisbòl. Sin embargo, e ekipo di Águila de Veracruz a laga Sharnol den libertat i e pelotero a bai forma parti di Broncos de Reynosa.

Sharnol a keda solamente 7 partido ku Broncos de Reynosa promé ku nan tambe a lag’e den libertat. Una bes agente liber, Sharnol a aseptá invitashon di Águila de Veracruz pa forma parti di nan staf tékniko, komo koach di bateo.

Den su 23 temporadanan, Sharnol a pasa den tur e diferente nivel an di beisbòl profeshonal den Liga Menor. Akinan e pelotero a logra un promedio di .303 den 23 temporada. Sharnol a forma parti tambe di e selekshon Hulandes di Beisbòl ku a partisipá na entre otro World Baseball Classic i Weganan Olímpiko. Na añanan 2003 i 2007 Sharnol a forma parti di e selekshon Hulandes ku a gana medaya di oro den kampionato Europeo di Beisbòl.