Hulanda ta pèrdè di Argentina den pinalti

SAO PAOLO – E selekshon Argentino a frustra e pase di e selekshon Hulandes pa e final di Kopa Mundial derotando e Hulandesnan den pinalti ku skor di 4-2. Ambos ekipo a mustra floho den nan atakenan i e oportunidatnan di gol tabata limitá. E ekiponan no a duna e impreshon ku ta un partido di semifinal nan tabata hunga. Tabata parse mas ku ambos ekipo tabata satisfecho ku un empate i no tabata sinti e urgensia pa anotá.

Den final di e di dos tempu regular e selekshon Hulandes a kuminsá preshoná un tiki mas i na di 90 minüt Arjen Robben a haña un bon oportunidat pa anotá pero esaki a keda frustra pa Javier Mascherano.

Den e 30 minütnan di tempu èkstra niun di dos ekipo no a logra habri e markadó poniendo ku e partido a pasa pa pinalti. Pa Hulanda kiper Tim Krul no tabata disponibel ya komo e ekipo a hasi tres kambio kaba. Mesora Sergio Romero di Argentina a hasi su mihó imitashon di Tim Krul i a salba dos pinalti pa Argentina. Pa Hulanda tabata Ron Vlaar i Wesley Sneijder ku no a logra anotá, miéntras ku Arjen Robben i Dirk Kuyt a anotá.

Ku e derota Hulanda lo enfrentá Brazil djasabra próksimo pa determiná e di tres i di kuater lugá di e kampionato Mundial di Futbòl.