WILLEMSTAD – Futbòl Liga MCB a kontinuá den wikènt tras di lomba ku sinku partido na Stadion Ergilio Hato. Den e promé partido djabièrnè anochi, e ekiponan di SUBT i Jong Colombia a hasi bon ku otro i empatá na 0 gol.
Djasabra e kampionato a kontinuá ku dos partido. Den e promé partido Jong Holland a enfrentá Vesta. Akinan tabata Jong Holland ku a bai ku e tres puntonan, derotando Vesta ku skor di 2-1. Pa Jong Holland e golnan a keda anotá pa Quinton Christina i Charles Martina. Miéntras ku pa Vesta e úniko gol a keda anotá pa Mownir Kasmi.
Den e di dos partido di djasabra e ekipo di Centro Dominguito a golia Hubentut Fortuna ku skor di 5-0. Pa Dominguito e golnan a keda anotá pa Micro Colina Jr., Ashar Bernardus, Shairon Bernardus (2x) i Shaquille Clements.
Djadumingu tambe tabata tin dos partido. Den e promé partido e ekipo di Victory Boys a enfrentá Undeba. Meskos ku djabièrnè anochi, e partido aki tambe a finalisá na 0 gol pa banda.
Den e di dos partido djadumingu e ekipo di Centro Barber a sa di derota Sithoc ku skor di 3-1 i asina logra e tres puntonan. Pa Centro Barber e golnan a keda anotá pa Andruw Stokkel i Ruensley Leuteria (2x). E úniko gol di Sitchoc a keda anotá pa Jason Inecia.