WILLEMSTAD – International Media Content Ltd (IMC), kual ta e agensia ku tin e derechonan di FIFA pa transmishon di Mundial Brazil 2014 den área di Karibe a konfirmá den un deklarashon ku TeleCuraçao tin e derechonan di transmishon na Kòrsou.
Segun IMC, nan a yega na un akuerdo ku TeleCuraçao pa e derechonan di transmishon eksklusivo riba diferente plataforma na Kòrsou.
E plataformanan ku TeleCuraçao tin drechi di transmishon riba dje ta:
- Televishon (TeleCuraçao)
- Cable (TDS)
- Radio (TCFM)
- Satélite (esaki TeleCuraçao lo no hasi uso di dje)
- Derecho di Closed Circuit
Pa loke ta trata establesimentunan komersial, FIFA a duna di konosé ku establesimentunan komersial manera hotel, bar i/of restaurantnan no mester di un lisensia di FIFA pa transmití e partidónan di Mundial Brazil 2014. Esaki miéntras tantu ku no tin aktividatnan komersial adishonal ta tuma lugá na e establesimentunan. Ku aktividatnan komersial adishonal FIFA ta konsiderá entre otro; kobransa na porta pa bin wak e partidónan sea direkto of indirekto, eventonan patrosiná i/of hasimentu di propaganda pa e evento.