WILLEMSTAD – Futbòl Liga MCB a kontinuá den wikènt tras di lomba ku e promé partidónan di e di dos buèlta na Stadion Ergilio Hato. Den e promé partido djabièrnè anochi, e ekipo di Centro Dominguito a empatá ku Jong Colombia na dos gol. Pa Dominguito e golnan a keda anotá pa Shaquelle Clements i Mirco Colina Jr., miéntras ku pa Jong Holland e golnan a keda anotá pa Rachmid Juliana i Dwayerllee Siliee.
Djasabra e kampionato a kontinuá ku dos partido. Den e promé partido di djasabra e ekipo di Undeba a enfrentá e ekipo di Vesta. Akinan tabata Undeba ku a bai ku e tres puntonan ganando ku skor di 4-0 di Vesta. E golnan a keda anotá pa Norvianel Naar na dos okashon, Edgard Casiano i un auto gol.
Den e di dos partido di djasabra Jong Holland i Sithoc a empatá un gol. Pa Jong Holland e gol a keda anotá pa Vurgell Bekeer, miéntras ku Jursly Kroonstadt a anotá pa Sithoc riba un pinalti.
Den e partido di djadumingu e ekipo di SUBT a bai kas ku e tres puntonan ora ku nan a derota Victory Boys ku skor di 2-0. Pa SUBT e golnan a keda anotá pa Greyon Alberto i Stallone Isenia.
Awe Liga MCB ta kontinuá ku otro partido ora ku Hubentut Fortuna enfrentá e ekipo di Centro Barber.