ROUND ROCK, TEXAS – E ekipo di Tripel A, Round Rock Express a anunsiá ku nan a añadí Juremi Profar na nan roster. Juremi a keda yama for di e kampamentu di entrenamentu ekstendé di Texas Rangers.
Mes ora Juremi a haña e oportunidat pa hunga su promé partido di Tripel A. Juremi a hunga tersera base pa e ekipo di Round Rock Express i a konektá un hit den tres turno na bate ku un kareda anotá.
Ku su 18 aña di edat Juremi a bira e pelotero di mas hóben ku ta hunga pa e ekipo di Round Rock Express.
Te ku un luna pasa Juremi a forma parti di e ekipo di Hickory Crawdads den Klase A. Akinan e pelotero a hunga den shete partido ku e ekipo di Crawdads kaminda e la konektá hit den tur partido ku e la hunga. Juremi a logra un promedio di .269, ku un honron i shete kareda empuha den e shete partido nan aki.