WILLEMSTAD – Futbòl Liga MCB a kontinuá den wikènt tras di lomba ku e ultimo sinku partido nan di e promé buèlta na Stadion Ergilio Hato. Den e promé partido djabièrnè anochi, e ekipo di Centro Dominguito ta empatá ku Victory Boys na 0 gol.
Djasabra e kampionato a kontinuá ku dos partido. Den e promé partido Hubentut Fortuna a enfrentá e ekipo di SUBT. Akinan tabata SUBT ku a bai ku e tres puntonan ganando ku skor di 3-1 di Hubentut Fortuna. Pa SUBT e golnan a keda anotá pa Alexander Klooster, Stallone Isenia i Greyon Alberto. Miéntras ku pa Hubentut Fortuna e gol a keda anotá pa Oscar Molina.
Den e di dos partido di djasabra Centro Barber i Undeba a empatá na dos gol. Pa Barber ambos gol a keda anotá pa Ruensley Leuteria. Miéntras pa Undeba tabata Norvianel Naar i Gaspard Baptisste ku a anotá.
Djadumingu tambe tabata tin dos partido. Den e promé partido e ekipo di Vesta a enfrentá Sithoc. Akinan tabata Vesta ku a sa di bai ku e tres puntonan ganando di Sithoc ku skor di 1-0. Pa Vesta e úniko gol a keda anotá pa Ruchnedro Kierindongo.
Den e di dos partido djadumingu e ekipo di Jong Holland a sa di derota Jong Colombia ku skor di 3-1 i asina logra e tres puntonan. Pa Jong Holland tur tres gol a keda anotá pa Isai Marselia, miéntras ku e úniko gol di Jong Colombia a keda anotá pa Ruengelo Cristina.