WILLEMSTAD – Futbòl Liga MCB a kontinuá den wikènt tras di lomba ku tres partido na Stadion Ergilio Hato. Den e promé partido djabièrnè anochi, e ekipo di Jong Holland a sa di derota Vesta ku skor di 6-1. Pa Jong Holland e golnan a keda anotá pa; Quinton Christina, Nathan Martina na dos okashon, Charles Martina, Arran McCarthy i Vurgel Bekeer. E úniko gol di Vesta a keda anota pa Kenley Winterdal.
Djasabra kampionato a kontinuá ku dos partido. Den e promé partido Hubentut Fortuna a enfrentá e ekipo di Jong Colombia. Akinan tabata Hubentut Fortuna ku a bai ku e tres puntonan ganando ku skor di 1-0. Pa Hubentut Fortuna e úniko gol a keda anotá pa Mauricio Moreno.
E di dos partido di djasabra tambe a kaba ku skor di 1-0. Akinan ta Centro Barber a sa di sali di e porta grandi, derotando Victory Boys. Pa Centro Barber e úniko gol a keda anotá pa Ruensley Leuteria.
Djadumingu no tabata tin partido i e kampionato ta kontinuá awe ku e partido entre FC Sithoc i Undeba.